"Ein stor dag for kultur- og idretts-Telemark", seier fylkesordførar Terje Riis-Johansen.

Vinje/Tinn – 2. november 2011:

– TelemarkHelten og HelteRennet som går av stabelen laurdag 4. februar 2012 blir seedingrenn for Birkebeinerrennet. Deltaking i TelemarkHelten kan såleis gje betre starttid i Birkebeinerrennet som er landets viktigaste og mest anerkjende langrennsarrangement.

Stor jubel

Den glade bodskapen om at HelteRennet fekk innvilga søknaden om å bli seedingrenn til Birkebeinerrennet vart motteken med stor jubel i idrettslaga som jobbar med TelemarkHelten. Vinje og Tinn kommune har i samarbeid med Innovasjon Norge i Telemark vore sentrale støttespelarar i etableringa av TelemarkHelten sidan starten i 2008.

Fantastisk skioppleving fyrste helga i februar 2012

– Dette er ein veldig viktig milepæl for oss som tek mål av oss til å skape ei fantastisk skioppleving for store og små i TelemarkHelten fyrste helga i februar neste år, seier rennleiar for HelteRennet Aud Irene Kittelsen.

Ein stor dag for kultur- og idretts-Telemark

– Dette er godt nytt for alle som er opptekne av å ta heile Telemark i bruk. TelemarkHelten er eit av mange gode prosjekt som er med å sette Telemark fylke på kartet, seier Terje Riis-Johansen som er fylkesordførar i Telemark. Å bli anerkjend ved å bli seedingrenn er ein stor dag for kultur og idretts-Telemark, seier Terje Riis-Johansen.

Positive verdiar og gode naturopplevingar

– Det er spennande å ta del i dette prosjektet som er med å setje Telemark på agendaen knytta til positive verdiar og gode naturopplevingar. Ringverknadene for reiseliv, handelsnæring, næringsliv elles og kommunane som er involverte rundt arrangementa gjev også ein positiv effekt som me gler oss over i Innovasjon Norge, seier Bård Stranheim som er adm. direktør for Innovasjon Norge i Telemark.

Indrefileten av løypenettet i Telemark

– Me gler oss til å syne frem indrefileten av løypenettet i Telemark oppunder Hardangervidda til så mange utøvarar som mogleg. I fjor deltok 1.150 utøvarar i langrennsøvingane som har sitt utgangspunkt i Rauland sentrum i Vinje, fortel rennleiar Aud Irene Kittelsen.

Meld deg på!

– Rennleiinga oppfordrar Birkebeinarar til å ta del i HelteRennet 4. februar for om mogleg å legge til rette for ein god startposisjon i Birkebeinerrennet 17.mars. Påmeldingsportalen som er tilgjengeleg på www.telemarkhelten.no er allereie opna så her er det berre å melde seg på, seier Kittelsen.